دكتور انعاش وتخدير يتوقّع أرقاما مفزعة حول إمكانية وفاة آلاف التونسيين جراء الكورونا في الأيام القادمة

دكتور انعاش وتخدير يتوقّع أرقاما مفزعة حول إمكانية وفاة آلاف التونسيين جراء الكورونا في الأيام القادمة ... ماتنساوش:إذا الشعب يوما اراد “الحَيَاةْ” فلابد ان يستجيب القدر#حجر_صحي_شامل_جديد

https://image.noelshack.com/fichiers...-publiqoue.jpg

توقّع دكتور الانعاش والتخدير في مستشفى القصاب زكريا بوقرة ارقاما مفزعة حول امكانية وفاة اكثر من 300 ألف مواطن تونسي في الايام القادمة جراء الكورونا داعيا إلى فرض الحجر الصحي مجددا وأضاف بوقرة بأنه لن يسكت أبدا إلا في صورة إيداعه السجن حسب تعبيره.


وهذا ما جاء في نص التدوينة كاملا:

الحملة الي بديناها عندنا 10 ايام للمطالبة بحجر صحي شامل جديد ماشية و تقوا. كل يوم قاعد نرى في اكثر عباد قاعدة تنضم معانا. صحيح الدولة تخلات علينا. صحيح حكومتنا بش تهزنا للهاوية. صحيح طبت البلاط الي في الجنة العلمية خانو الامانة.ولكن لهذا الوطن شعب يحميه. أنا متأكد ان ضغطنا سيوصل الى نتيجة.

صحيح فما برشة عباد مازالو مش مقتنعين. ونفهمهم. يقلك: أنا ضحيت ثلاثة شهور فقرة، تطردة، صغاري جاعو، وبعد يجيو هالمجرمة الي على راس الدولة يحلو لحدود. اكهو عاد يتحملو هوما المسؤولية. المشكل الي ما عندهم ما يتحملو. هما شايخين في بيرواتهم وكان مرضو فرش الانعاش في المستشفى العسكري يستنا فيهم.أما نحن الشعب الي بش نخلصو الفاتورة. وفاتورة ما فماش ما اغلا منها.

نحنا الي بش نشوفو امهاتنا و ابائنا يموتو بين يدينا وما عنا ما نعملو على خاطر فروشات السبيطارات معبين. نحن الي بش نخصرو العزاز علينا و مناش بش نجمو حتى ندفنوهم. يلموهم لكل مع بعضهم و يطيشوهم في حفرة. نحنا الي بش نشوفو النجوم في القايلة كي بش يضربنا المرض وفما منا الي بش يقعد حياتو الكل معاق. الي مشلول مشلول والي ماعادش يتنفس من غير دبوزة الاكسجان الي كلاويه تاقف وترصيلو في الدياليز الخ…..

أي المرض هذا ما يرحمش. موش تفدليك جملة.التوانسة بااااااارشا منهم تمنيكو على التوقعات الي عملتهم في مارس. ونساو ان الخروج الاعلامي هذاكة هو الي جبر الدولة انها تعمل الحجر الصحي. نساو انو في الاخر التوقعات تحققة كيما هيا. تكهنت ب55 ميت اذا نسكرو نهار 23 مارس ياخي صارو 50 في اخر الموجة الاولى. موش على خاطرني سحار و الى عندي قدره الاهية بش نشوفو المستقبل. لا، على خاطر الرياضيات ما تغلطش. ليوم نفس الرياضيات تقول كان ما نعملوش حجر صحي شامل جديد من هوني لين يخرج اللقاح بش نخصرو بين 70000 و 300000 تونسي.

اذا واضح الحل. الحل في وحدتنا كشعب في للمطالبة بحجر صحي شامل جديد. صحيح بش تصير ازمة اقتصادية كبيرة. أما هكا والى هكا بش تصير ازمة ما عرفتش الإنسانية كيفها من عام 1929. الفلوس، الخدمة، الدار، الكرهبة، كل شي يتعوض. الي ما يتعوضش هي الحياة.هذاكا لواش نطلب منكم ليوم انكم تنضمو لجيش الإنسانية، جيش الحياة ضد الموت. كونو فعالين في الحملة لاجبار الدولة على أعلان الحجر الصحي الشامل. من جيهتي الضغط بش يكون متواصل وتصعيدي الى أعلى درجة (مازلت محضرلهم برشا مفاجئات) . مادامهم ما حطونيش في الحبس نوعدكم أنني مانيش بش نتخلا عليكم. متأكد أننا سننتصر. ماتنساوش:إذا الشعب يوما اراد “الحَيَاةْ” فلابد ان يستجيب القدر#حجر_صحي_شامل_جديد