المساعد الشخصي الرقمي

مشاهدة النسخة كاملة : كيفية إستخراج رخصة القيادة فى الولايات المتحدة الامريكية شروط و اجراءات رخصة القيادة



jobs4arab
11-25-2012, 01:57 PM
كيفية إستخراج رخصة القيادة فى الولايات المتحدة الامريكية شروط و اجراءات رخصة القيادة

الشروط كالتالى لازم يكون معاك 5 حاجات علشان تقدر تعمل الرخصة
1- أثبات شخصية وفى الحالة دية لازم يكون معاك الباسبور
2- اى شئ يفيد انك مقيم دائم ودة المقصود بية الجرين كارد وبالطبع انت هتستلمة بعد شهر من وصولك ان شاء الله
3- السوشيال سيكيورتى ودة مش مشكلة هتاخدة بعد اسبوع من تقديمك علية ان شاء الله
( 4 - 5 ) البندين دوول مطلوب منك انك توفر حاجتين على الاقل من اكتر من شئ زى مثلا
( عقد أيجار بأسمك - ايصال كهرباء او غاز - شهادة الثانوية العامة من امريكا - حساب بنكى ودة مش بتاخدة غير بعد شهر من فتح الحساب - شيك مرتب من شركة لو انت موظف .......) وفية كذا شئ بس انا مش فاكر
اللى حصل معايا انى قدمت حساب بنكى وشيك المرتب من الشركة
هتروح على المقر وبتطلب الأمتحان النظرى ودة أمتحان من 40 سؤال بيختبرك فى بعض الأمور الأساسية أثناء السير والمواقف التى قد تتعرض لها وبيعرف من خلالة رد فعلك تجاة المواقف التى من الممكن ان تقابلك أثناء القيادة ( الأمتحان قد يكون باللغة العربية أو الأنجليزية أو الأسبانية ...... هذا طبعا ينطبق على ميتشيجان ولا أعلم ينطبق فى أى ولاية أخرى أم لا ) .ومن المفترض انك لا تخطأ فى أكثر من 8 أسئلة يعنى لو أخطأت فى 9 أسئلة تكون فشلت فى أجتياز الأختبار
ثانى نوع من الأسئلة هو عبارة عن 10 أسئلة فى العلامات التى قد تراها أثناء السير ومعنى كل علامة ومن المفترض انك تحل 8 اسئلة صحيحة يعنى لا تخطئ فى أكثر من سؤالين .
يعنى فى الامتحان الاول 8 اسئلة والثانى 2 فقط لاغير
طيب نفترض انك لا قدر الله أخطأت فى عدد كبير هتقوم بمعرفة أخطاءك من الموظفة وهى هتخليك تعرفهم وتقوم قايم بإعادة الأختبار من جديد فى نفس اللحظة .... عدد مرات دخول الأمتحان غير محدد يعنى طول ما فية وقت تقدر تدخل الأمتحان وتعيدة مرات ومرات
طيب أن شاء الله لو قدر ربنا ونجحت دية البداية بيعطوك ورقة أسمها البرميت وطبعاً النظام هنا أنك بتاخد الورقة دية وتستنى 30 يوم لحد ما تعمل اختبار القيادة على أعتبار انك فى فترة تدريب على القيادة ... وفى نفس الوقت لو هتسوق السيارة ومعاك الورقة دية فقط يبقى لابد ان يكون فية حد جالس جنب منك معاه رخصة القيادة الخاصة بالولاية
ولو لاقد الله اى ضابط وقفك وسألك على رخصة القيادة وأنت مش معاك أحد أوعى تطلع الورقة دية لأنك لو طلعتها بدون ما يكون معاك حد جنب منك معاه الرخصة دية مخالفة صارخة للقانون وفيها غرامة هتدفهعا يعنى هتدفعها ومع كدة لازم تروح المحكمة وممكن يكون فيها عقوبة شديدة ( الموضوع دة حاليا مع واحد كان بيمتحن معايا والضابط وقفة بالبرميت فقط ودفع 175 دولار غرافة وبرضة مطلوب فى المحكمة وربنا يسترها علية )
طيب تعمل اية فى حالة ان الضابط وقفك وانت مش معاك حد بتطلع على طوول الرخصة الدولية وكمان معاها الرخصة المحلية المترجمة وفى الحالة دية كل اللى هيعملة معاك لو أنت مش مخالف فى سرعة أو شئ أنة ممكن يقولك أنها مش سارية هنا لكن ضرر دية أخف من ضرر الأولى بكتييير .
طيب بعد مرور ال 30 يوم هم مع البرميت بيعطوك قائمة بالممتحنيين اللى ممكن تتصل بيهم بعد مرور ال 30 يوم وتحدد معاهم وقت الأختبار العملى ودة أختبار بيتم بسيارتك او بأى سيارة بتجيبها معاك او بسيارة الممتحن بس ساعتها هتكون التكاليف عالية ..
الأمتحان العملى بيكون كالتالى :- إختبار فى عملية ركن السيارة ودية 3 حالات لركن السيارة مختلفة هحاول ان شاء الله اسحبها سكان واحطها على الموضوع .عدد الأخطاء المسموح فيها اثناء الركن 6 أخطاء وأى خطأ زيادة بيخليك تعيد الأمتحان من الأول بس بشرط مرور 24 ساعة على الأختبار الأول ودة معناة مصاريف جديدة ونقطة ومن أول السطر .
طيب إن شاء الله ربنا كرمك وعديت من الأختبار الخاص بالركن بتدخل على أختبار الطريق ودة بيكون فى حدود 20 دقيقة بيطلع معاك الممتحن جنب منك وبياخدك فى كل أنواع الطرق اللى ممكن تمشى فيها سواء كانت أماكن سكنية أو طريق داخل البلد أو طريق سريع ودايما تحافظ على السرعة المقررة الموجودة على جانبى الطريق ولو السرعة بزيادة أو بنقصان دة معناه انك بتفشل فى الأمتحان يعنى لازم تحافظ على السرعة فى حدود ميل او 2 ميل بالزيادة أو بالنقصان لكن لو 5 أميال زيادة أو نقص دة معناة انك هتعيد الأمتحان تانى .... فية نقط ممكن تخليك لاقدر الله تفشل فى الأمتحان دون ما تكملة زى مثلاً وانت بتمتحن كسرت إشارة دة معناة انك تلف وترجع تانى على مكان نقطة الأنطلاق لأن دية جريمة كبيرة جدا هنا .... المهم عدد الأخطاء المسموح بيها 25 خطأ ( كل هذه الأخطاء تكون غير جسيمة ) يعنى لاتمثل خطورة أثناء القيادة لأنة لو فية خطأ جسيم دة هيخليك الأ/تحان من أول وجديد ........
بعد أن تجتاز الأمتحان سيقوم الممتحن بإعطاءك شهادة موقعة منة ( شهادة كدة زى شهادات الماجيستير عندنا ) يعنى ممكن تبروزها وتعلقها فى البيت ..... وساعتها الممتحن بيقولك welcome in America أنا أتقالى كدة بصراحة .
المرحلة الأخيرة :- بتروح على المكان اللى انت استخرجت منة البرميت ومعاك البرميت وشهادة النجاح وبعض الاوراق التانية زى الجرين والسوشيال وتروح هناك علشان تتصور وتعمل التيمبرورى ودية ورقة زى البرميت بالضبط بس مع إختلاف العنوان فقط لكن فى أهميتها لها أهمية كبيرة لأنها بمثابة رخصة القيادة ودي بتقدر تسوق بيها حتى تصلك الرخصة على البيت خلال أسبوع من أستخراجك التيمبرورى

تم النقل لتعم الفائدة ... شكرخاص لصاحب الموضوع

sisko
08-29-2015, 11:18 PM
كيفية إستخراج رخصة القيادة فى الولايات المتحدة الامريكية شروط و اجراءات رخصة القيادة
كيفية إستخراج رخصة القيادة فى الولايات المتحدة الامريكية شروط و اجراءات رخصة القيادة
كيفية إستخراج رخصة القيادة فى الولايات المتحدة الامريكية شروط و اجراءات رخصة القيادة